(क्रीमशिवाय) क्रीम ऑफ पालक सुप ;-)

Popeye चं सुप या नावाने आमच्या घरात हे सुप लोकप्रिय झालय...हिरव्यागार रंगामुळे दिसायला अतिशय आकर्षक आणि चवीला सौम्य होत असल्याने लहान मुलांना अतिशय आवडते. आणि करायला एकदम झटपट...
फार पाल्हळ न लावता कृतीकडे वळतेच आता....

प्रमाण : २-३ माणसांसाठी
वेळ : १५-२० मिनिटे

साहित्य :

- पालक जुडी १/२ पेक्षा थोडी कमी
( पाने खुप नाजुन आणि छोटी असतील तर १/२ जुडी घ्या पण आजकाल पुण्यात मिळणारा पालक आळुशी स्पर्धा करत असल्याने फारच दांडगी पाने मिळतात )
- १/२ कांदा चिरुन
- ७-८ लसुण पाकळ्या
- १ कप दुध
- १ चमचा कणीक / कॉर्नफ्लोअर
- १ छोटी हिरवी मिरची
- मीठ, मिरीपुड चवीनुसार

कृती :

१. पालक पाने स्वच्छ धुवुन निथळुन घ्या. एका पसरट कढईत कांदा, ३-४ लसुण पाकळ्या आणि मिरची बुडतील एवढे पाणी घालुन शिजवायला ठेवा.
२. कांदा जरासा पारदर्शक झाला की त्यात पालक ची पाने हाताने तु़कडे करुन टाका.अजुन पाणी घालायची गरज नाही. पालकाला पाणी सुटेल.
३. पालक शिजला की गॅस बंद करा. (पालकाचे आकारमान एकदम कमी होउन कढईच्या तळाशी भाजीसारखे मिश्रण दिसु लागेल.तेव्हा झाला असं समजायचं )
४. मिश्रण जरा गार झाले की मिक्सर च्या भांड्यात काढुन घ्या आणि त्यात १ चमचा कणीक टाका.आणि बारीक पेस्ट करुन घ्या. छान गुळगुळीत पेस्ट झाली पाहिजे.
५. आता त्यात हळुहळु दुध घालुन एकजीव पेस्ट करुन घ्या.
६. हे मिश्रण पातेल्यात काढुन त्यात गरजेपुरत म्हणजे सुप जितकं पातळं हवं तितकं पाणी घालुन घ्या आणि चवीपुरते मीठ आणि मिरपुड घालुन एक उकळी काढा.
७. आता सगळ्यात चवदार भाग :
उरलेला ३-४ पाकळ्या लसुण एकदम बारीक चिरुन घ्या.
एका छोट्या कढल्यात १ चमचा तूप गरम करा आणि त्यात हा लसुण मस्त खरपूस तळुन घ्या आणि ही फोडणी सुपवर अगदी वाढायच्या वेळेस ओता...

तयार आहे गरमागरम (क्रीमशिवाय) क्रीम ऑफ पालक सुप ;-)

टीप :
१. डाएट साठी करताना शेवटची फोडणी वगळा.
२. मुलांना देताना यात ताजे घरचे लोणी कींवा चीज खिसुन टाका.
3.सुप मद्धे मीठ अगदी जपुन घाला कारण पालक अतिशय पटकन खारट होतो