आदिमाया आदिशक्ती

गेल्या वर्षी नवदुर्गांच्या नावांच्या रांगोळ्या काढल्या होत्या. रोज एक नवदुर्गा, तिची माहिती, स्तोत्र असं सगळं शोधायचा प्रयत्न केला होता. यंदा काय नवीन करावं सुचत नव्हतं. घटस्थापनेची घाटाची रांगोळी काढली आणि विचार सुरु केला. उद्यापासून काय ?

महाराष्ट्रातल्या साडेतीन शक्तिपीठांच्या रांगोळ्या काढू असं ठरवलं. तुळजाभवानी, अंबाबाई, रेणुकामाता, सप्तश्रुंगी चार देवी तर आहेतच. अजून विचार करता करता यमाईदेवी हे मूळपीठ आणि एकविरा आई पण आठवली. सातव्या माळेपर्यंत महाराष्ट्रातली देवी पीठं मिळाली. पुढचं सुचेना. तशा तर बऱ्याच देवी आहेत पण शक्यतो शक्तिपीठं, मूळपीठं काढायचा प्रयत्न होता. मनात म्हणलं उद्याचं उद्या बघू. देवीच बघून घेईल.

अष्टमी दिवशी सकाळी महालक्ष्मी काढूयात असं म्हणून रांगोळीचा डबा घेऊन बाहेर गेले पण मनात सतत कुठेतरी वाटत होतं कि अंबाबाई म्हणजेच महालक्ष्मी आणि ती आपण काढली आहे आधीच. पण आता अजून कुठली देवी सापडेना. इतक्यात समोर राहणारे काका बाहेर आले. कुठेतरी दुकानात निघाले होते.

"रोज बघतोय मी रांगोळ्या. छान येतायत. आमची देवी कधी काढणार ?"

"तुमची देवी कोणती काका ?"

"अंबेजोगाईची देवी. ती एकच कुमारिका आहे."

चला देवीनेच कोडं सोडवलं. गुगल बाबांनी पुढची मदत केली आणि अंबेजोगाईची योगेश्वरी साकार झाली. रांगोळी काढताना त्या दिवशी डोळेच वाहायला लागले.किती लक्ष आहे तिचं माझ्यावर. माझ्या साध्यासुध्या प्रश्नाला इतक्या सहजतेने ती उत्तरं शोधून देते तर आयुष्यात कुठल्याही अवघड प्रसंगाला ती असणारच आहे.

आज नवमीला जगाची आई जगदंबा साकारली आणि या नवरात्रीचा संकल्प देवी आईनेच पूर्ण करून घेतला.

रोज रांगोळी काढताना देवीचं रूप डोळ्यासमोर येत होतं. मानसपूजा होत होती.या नऊ दिवसांच्या नऊ रांगोळ्या त्या आदिशक्तीला अर्पण

चराचरात भरून राहिलेल्या या शक्तीचा आशीर्वाद असाच कायम तुमच्या आमच्या पाठीशी राहो.

देहि सौभाग्यमारोग्यं देहि देवि परं सुखम्

विद्यावन्तं यशस्वन्तं लक्ष्मीवन्तञ्च मां कुरु

रूपं देहि जयं देहि यशो देहि द्विषो जहि

-स्मिता श्रीपाद

नवरात्र 2024