निळा तुकडा

 फेसबुक च्या जुन्या फोटो मधुन दिसणारा,

माझ्याच घराचा निळा तुकडा बघुन,

परत एकदा दिसायला लागलं,

सगळं लख्ख......तसंच्या तसं.......

जे जिथं सोडलंय,

ते अजुनही तिथेच आहे......

रात्री जागुन मारलेल्या गप्पा,

लटकी भांडणं आणि रुसवे फुगवे,

आरड्याओरड्याचे आवाज,

हास्यविनोदाचे फवारे,

खमंग थालिपीटाचे वास,

वाफाळलेला भात आणि गरम भाकरी

कपडे,खेळणी,पुस्तकांचा अद्रुश्य पसारा,

आईचा स्पर्श,

मनात खोल पुरुन ठेवलेल्या जखमा

आणि

चाफ्याचा वास.