प्रिय आई

 

प्रिय आई,

आज तुझा वाढदिवस...

'You are always with us…You are watching us…'

वगैरे वगैरे अजिबात लिहिणार नाहीये आज....

सारखे कसले शब्दांचे बुडबुडे नुसते...

हाडामासाचा माणूस...असतो किंवा नसतो

मधलं अधलं काहीच नाही...नाही म्हणजे नाही...

स्पर्श नाही... वास नाही... आवाज नाही... चाहूल नाही...

काही काही नाही....

काय अर्थ आहे ना याला ?

सारखी सारखी काय मनाची समजूत काढायची ?

"तू आहेस आमच्यासोबत... आमच्या आत" ई ई

हे सगळं ठीक आहे ...

पण ...

प्रत्येक वेळी तुला भेटून घराबाहेर पडतानाची तुझी मिठी

गालावर झालेला तुझ्या ओठांचा पुसटसा स्पर्श

तुझ्या साडीचा,ओढणीचा वास

तुझा आवाज तुझा स्पर्श

तुझ्या हातची चव उतरलेला खमंग आमटी भात

हे सगळं त्या 'तू आहेस कुठेतरी' मध्ये कुठून आणायचं ?

खूप गप्पा मारायच्या राहिल्या

माझं खूप सारं लिखाण तुला दाखवायचं राहिलं

तुझ्या 60 व्या वाढदिवशी तुला सरप्राईज द्यायचं राहिलं

माईनमूळ्याच्या लोणच्याची रेसिपी घ्यायची राहिलीच

मनाशी ठरवलेले सगळे बेत तसेच राहिले...

तुझ्याशी किती दिवसात भांडलेच नाही ना गं...

म्हणून हा आजचा रंग भांडणाचा....

हे असं अचानक लिहिलं म्हणून घाबरू नकोस...

खचले नाहीये... खंबीर आहे...तूच बनवलंयस...

सारखं समजूतदारपणा दाखवायचा कंटाळा आला...

तुझी आठवण येतेय गं...

तुला वाढदिवसाच्या खूप खूप शुभेच्छा

खूप प्रेम

तुझीच,

ताई