मनातले काही...: ज्ञान प्रबोधिनी युवती विभाग क्रीडा प्रात्यक्षिक

*"अभिमानाने, अनासक्तीने, विश्वासाने, विनयवृत्तीने, एकविचारे, एकमताने एक आम्ही होऊ"*

या पद्याची प्रचिती काल *ज्ञान प्रबोधिनी युवती विभाग क्रीडा प्रात्यक्षिकांच्या* निमित्ताने आम्ही घेतली.धाडस, चिकाटी आणि मेहेनत याचा त्रिवेणीसंगम काल 26 जानेवारी ला झालेल्या क्रीडा प्रात्यक्षिकात दिसून आला.

इयत्ता पाचवी ते दहावी च्या प्रशालेतील मुली, माजी विद्यार्थिनींचा महाविद्यालयीन गट, प्रशालेची इतर ठिकाणी जी दले भरतात तिथला प्रबोध शालेय गट आणि आजी-माजी माता पालकांचा अतिशय उत्साही असा प्रौढ युवती गट अशा साधारण 300 युवतींनी संपूर्ण 1:30 तास आम्हा प्रेक्षकांना खिळवून ठेवले.

लंगडी, लगोरी, कबड्डी, खो-खो अशा खेळाच्या सादरीकरणातून आम्हाला थेट बालपणात फिरवून आणले. कराटे,अमेरिकन डॉजबॉल अशा परदेशी खेळांची सुद्धा ओळख झाली.

माता पालकांच्या प्रौढ युवती गटाचे उत्साही सादरीकरण सुंदर झाले. त्यांचा उत्साह बघून त्यांच्या गटाचे नाव आता *तरुण युवती गट* करायला हरकत नाही

. आपापले उद्योग सांभाळून त्यातूनही वेळ काढत त्यांनी केलेला सराव जवळून पाहिल्याने जास्त कौतुक.

लहान मुलींचं कराटे सादरीकरण आणि त्याला जोड द्यायला महाविद्यालयीन गटाने केलेली हॅन्ड ब्रेक, एल्बो ब्रेक, किक ब्रेक,जम्प ब्रेक अशी थरारक प्रात्यक्षिके म्हणजे निव्वळ अप्रतिम..एक घाव दोन तुकडे

सायकल आणि मोटारसायकलवरची चित्तथरारक प्रात्यक्षिकं बघताना एक क्षण श्वास रोखले जात होते आणि पुढच्याच क्षणी टाळ्या आणि आनंदोद्गार बाहेर पडत होते.

अकॉस्टिक योगा च्या गटाने तर कमाल केली. *"तुला तोलुनि धरते मी अन तू ही मजला सावर सावर"* अशी अवस्था.. एकमेकींवरचा विश्वास आणि धाडस याचा उत्तम अविष्कार होता तो. त्याला जोड द्यायला रोप मल्लखांब सादरीकरण अप्रतिम झाले.

या सगळ्या खेळांमध्ये शिवकालीन पारंपरीक लाठीकाठी आणि भाला सादरीकरण आणि त्याच्या जोडीला *"इंद्र जिमी जंभ पर... सेर सिवराज है"* सुरु झालं तेव्हा अंगावर काटा आणि डोळ्यात पाणी होतं... आनंदाचं..अभिमानाचं..

पेटते पलिते घेऊन मैदानात उतरलेल्या महाविद्यालयीन गटानं डोळ्यांचं पारणं फेडलं. जणू त्यांना सांगायचं होतं..

*"कधी असेन साधी ठिणगी*

*वा ज्योत शांत तेवती*

*पण ठाऊक माझे मजला*

*मी अग्निशिखा तळपती"*

या सगळ्यावर कळस चढला तो बर्ची प्रात्यक्षिकाने.. पंचप्राण तल्लीन झाले आणि फक्त *"प्रबोधिनीचा ललकार"* उरला...

एक आवर्जून उल्लेख करावासा वाटतो. सुरुवातील ध्वज नमस्ते झाल्यावर पुढचे संपूर्ण दोन तास, युवतींचा एक गट ध्वज पूर्णवेळ हातात धरून उभा होता. *"तेजाळून अग्नीने गर्जातोचि मंत्र हा, हृदयाग्नि प्रज्वलीत भगवा स्वतंत्र हा"* ही या युवतींसाठी निव्वळ घोषणाच नाही तर त्या ध्वजाचा मान कसा ठेवायचा ते त्यांना माहिती आहे.

1:30 तास कधी उडून गेला कळलंच नाही. नियोजनात कुठेही बारीकशी चूक नाही की गडबड नाही. गेले दोन महिने प्रज्ञा ताई, दलावरच्या सगळ्या ताया आणि मुलींची मेहेनत आम्ही ऐकत होतो, बघत होतो. त्या सगळ्या प्रयत्नांचा उत्कट अविष्कार काल बघायला मिळाला. बैठक व्यवस्था, ध्वनी, प्रकाश, नावनोंदणी आणि इतर सर्व नियोजन अगदी बिनचूक.

*युवती विभाग सचिव प्रज्ञा ताई, क्रीडा प्रात्यक्षिक प्रमुख निवेदिता ताई, गार्गी ताई, पालवी ताई, अन्विता ताई, श्रद्धा दांडेकर ताई, श्रद्धा भट ताई, हर्षाली ताई आणि बाकी सर्व युवती तायांचे मनापासून आभार, अभिनंदन आणि कौतुक